"Yurtimizda bayramlar ko‘p, lekin yoshlarga bag‘ishlangan alohida bayram yo‘q. Bugun shu masalani ham hal etadigan vaqt keldi, - dedi O‘zbekiston Prezidenti "Kamolot" qurultoyida.

       "O‘zbekiston yoshlar ittifoqi tashkil etilgan kun – 30 iyun sanasini mamlakatimizda “Yoshlar kuni” deb e’lon qilsak, qanday bo‘ladi?, - deya taklif bildirdi Shavkat Mirziyoev.

"Haqiqatdan ham, biz, ota-onalar, ustoz va murabbiylar sizlarni, butun O‘zbekiston yoshlarini Vatanimiz, jamiyatimizning hal qiluvchi kuchi deb bilamiz va sizlar hamisha xalqimizning mana shunday yuksak ishonchiga munosib bo‘lasiz, deb ishonamiz.

      Sizlarga yaxshi ma’lum, hozirgi vaqtda yurtimizda “Buyuk kelajagimizni mard va oliyjanob xalqimiz bilan birga quramiz” degan shior keng tarqalib, hayotimizga tobora chuqur kirib bormoqda. Lekin O‘zbekistonimizning mana shunday yorug‘ va farovon istiqbolini bunyod etishdek mas’uliyatli vazifani kim o‘z zimmasiga oladi?

Albatta, faqat zamonaviy bilim va kasb-hunarlarni puxta egallagan, mustaqil fikrlaydigan, doimo el-yurt taqdiriga daxldorlik tuyg‘usi bilan yashaydigan siz, aziz yoshlarimiz maydonga dadil chiqib, bugungi kunda hayotning o‘zi oldimizga qo‘yayotgan vazifalarni hal etishga qodirsiz.

      Mana shunday ulug‘ maqsadga erishish yo‘lida, O‘zbekiston yoshlar ittifoqini tom ma’noda mamlakatimizdagi barcha yoshlarning tayanchi va suyanchiga aylantirish yo‘lida sizlarga sihat-salomatlik, kuch-g‘ayrat, baxt va omad yor bo‘lishini tilab qolaman", - deya so‘zlariga yakun yasadi Prezident.

Bu yil O‘zbekistonda ikkinchi marotaba 30 iyun — Yoshlar kuni nishonlanadi. 2017 yil 30 iyun kuni «Kamolot» Yoshlar ijtimoiy harakatining IV qurultoyida nutq so‘zlagan O‘zbekiston prezidenti Shavkat Mirziyoev ushbu sanani mamlakatda “Yoshlar kuni” sifatida nishonlash tashabbusini ilgari surgan edi. 26 avgustda esa «O‘zbekiston Respublikasi yoshlari kunini belgilash to‘g‘risida"gi qonun matbuotda e’lon qilindi va kuchga kirdi.

    Mana, oradan qariyb ikki yil o‘tdi. Endi O‘zbekistonda “Yoshlar kuni” qanday nishonlanadi, qanday nishonlanishi kerak, kabi savollar tug‘ilishi tabiiy. Katta ehtimol bilan mazkur bayramning asosiy tashkilotchisi — Yoshlar ittifoqi hamkor vazirlik va tashkilotlar bilan bu kuni ko‘plab tadbirlar, konsertlar, sport musobaqalari, tanlovlar, uchrashuvlarni o‘tkazadi. Shu bilan birga, kunning asosiy tadbirlaridan biri — O‘zbekiston Prezidenti ishtirokidagi Yoshlar ittifoqi qurultoyi o‘tkazilib, yil sarhisobi qilinadi, kelgusidagi reja va dasturlar qabul qilinadi.

     Avvalo Yoshlar kuni mamlakatdagi barcha yoshlar uchun chinakam bayramga aylanishi lozim. Faqat talabalar, o‘quvchilar, Yoshlar ittifoqi faollari, «tanlanganlar» va «xoslar», poytaxt va katta shahar yoshlari bayramni nishonlab, qolganlar uni televizordan tomosha qilishi adolatdan emas. Bu kun mamlakatdagi har bir yoshning chinakam bayrami bo‘lishi, hatto chet ellardagi o‘zbek yoshlari ham ushbu sanani o‘ziga xos bayram sifatida nishonlashlariga erishish kerak. Bayram kayfiyati kasalxonalar, harbiy qismlar, zavod-fabrikalar, davlat tashkilotlari, hatto jazoni ijro etish muassasalariga qadar kirib borishi kerak.

     Albatta, bu juda katta, hattoki bajarish imkonsizdek tuyulgan talab bo‘lishi mumkin. Ammo “Yoshlar kuni”ni nishonlashni istagan har bir yoshga imkoniyat, tanlash huquqi berilishi kerak. Hech bo‘lmasa onlayn tanlovlar, aksiyalar, fleshmoblar, televizion shoular, radio orqali tabrik va muloqotlar uyushtirish yo‘li bilan ularni bayram tadbirlariga jalb qilish, faol yoshlarni moddiy va ma’naviy rag‘batlantirish mumkin.

    “Yoshlar kuni” — faqat o‘yin-kulgu, shodu xurramlik emas. Bu kun uchun muayyan mavzu tanlanishi, hukumat a’zolari, rasmiylar, xalqaro tashkilotlar vakillari, mutaxassislar va albatta yoshlar vakillari ishtirokida yoshlarga oid muammolar yuzasidan fikr-almashish, echim va takliflar ishlab chiqilishi zarur. Masalan, yoshlarning huquqiy savodxonligi, bo‘sh ish o‘rinlarini yaratish va ularni qanday qilib topish bo‘yicha yoshlar xabardorligini oshirish, yoshlarni chekish va ichkilikbozlikdan himoya qilish, yoshlar ishbilarmonligi kabi dolzarb masalalar yuqori darajada muhokama qilinishi lozim. Bu muhokamalar keyinchalik huquqiy hujjat, dastur, loyiha yoki yo‘l xaritasi ko‘rinishida hayotga tatbiq etilishi mumkin.

    “Yoshlar kuni” munosabati bilan yoshlarning huquqiy savodxonligi, axborot madaniyatini yuksaltirish, huquqlari, imkoniyatlaridan xabardorligini oshirish bo‘yicha targ‘ibot-tarqatma materiallar tayyorlanishi va shahar-qishloqlarda tarqatilishi mumkin. Deylik, ularda kollej bitiruvchisining huquq va imtiyozlari, qonuniy manfaatlari buzilgan taqdirda kimga va qanday tartibda murojaat qilishi mumkinligi, tadbirkorlikni boshlash uchun kredit olishdagi imtiyozlar va boshqa zarur axborotlar, yoshlar uchun foydali axborot manbalari haqidagi ma’lumotlar kiritilishi mumkin.

      Bayram munosabati bilan yoshlar tashabbuslari, g‘oya va takliflarini qabul qilish, ularga javob berish va reaksiya bildirishning jonli hamda samarali shakllarini ishlab chiqish mumkin. Har kim vaziyatni o‘zgartirish huquqiga ega. Masalan, joylarda o‘z tashabbusingni prezident, YOshlar ittifoqi rahbari, vazir yoki biror taniqli ishbilarmonga etkaz, degan shior ostida rahbarlarning virtual qabulxonasiga murojaat yo‘llash uchun sharoitlar yaratilsa, ularga maslahat va yo‘l-yo‘riqlar berilsa. CHunki hamma yoshlar ham avvalo bunday imkoniyatlar mavjudligini, so‘ngra ulardan foydalanishni bilaverishmaydi, ayrimlari esa istihola qiladi yoki jur’ati etmaydi. Uning qalbida hech bo‘lmasa o‘z mahallasi, o‘z oilasi farovonligi uchun xizmat qiluvchi g‘oya, taklif yoki tashabbus bo‘lishi mumkin.

       Bayram haqiqiy bayramdek bo‘lishi uchun barcha tadbirlar yakuniga etganidan so‘ng tungi vaqtda albatta mushakbozlik qilinishi kerak. Hech bo‘lmasa poytaxt va barcha hududlar markazida mushak otilishi kutilgandan ham ko‘proq yoshlar e’tiborini jalb qilishi mumkin.

Ushbu bayram munosabati bilan bizing korxonamizda ham keng ko‘lamli ishlar amalga oshirilmoqda. Boshqarmamizda korxonamiz yoshlarini va xodimlarini kitobga qiziqishlarini ortirish maqsadida korxona hududida kutubxona tashkil etildi. Kutubxonamizda badiiy, tarixiy, adabiy, siyosiy va har xil janrdagi kitoblar joy olgan. Ushbu kitoblardan korxonamiz yoshlari va barcha xodimlarimiz foydalanishmoqda.

     Yoshlarimizni sport o‘yinlariga jalb qilish maqsadida korxonamizda 22-26 iyun kunlari boshqarmamiz va filiallarimizdan 30 yoshgacha bo‘lgan yoshlari uchun futbol musobaqalari tashkil etilib, unda boshqarma, 4 ta shahar va 15 tuman filiali yoshlari ishtirok etishdi. Ushbu musobaqani tashkillashdan maqsad yoshlarimizning bo‘sh vaqtlarini sportga qaratishligi, jismonan sog‘lom bo‘lishligi ko‘zda tutilgan. Musobaqa g‘oliblariga kubok, diplom, sertifikat hamda esdalik sovg‘alari topshirildi. Unga ko’ra birinchi o’rinni egallagan Rishtin tumani filiali yoshlariga “Toshkent-Samarqnad-Buxoro” yo’nalishi bo’yicha, ikkinchi o’rinni egallagan boshqarmamiz yoshlariga Farg’ona viloyati Farg’ona tumani Shoximardonga sayohat, uchinchi o’rinni egallagan filial yoshlariga kechki dasturxon sertifikatlari topshirilib, ularni ushbu yo’nalishlari bo’yicha safarga kuzatib qo’yildi.